Celula terroriste iraniane kishte planifikuar të sulmonte kampin e muxhahedinëve nëpërmjet një makine-bombë.
Në një intervistë për “Ora News”, përfaqësuesi i muxhahedinëve për Uashingtonin, Ali Safavi deklaroi se terroristët kishin arritur të mblidhnin materialet e nevojshme. Ndërsa hodhi akuza ndaj ambasadorit të dëbuar të Iranit nga Shqipëria. Sipas tij, ky i fundit është ulur në një tryezë me ish- Sekretarin amerikan të Shtetit, John Kerry, ku kanë biseduar për marrëveshjen bërthamore.
Safavi dyshon që terroristët do të godisnin përmes një makine-bombë kampin Ashraf, në festën e Novruzit, teksa shton që dështuan.
“Gjithashtu, edhe në Paris në një mbledhje tonën ata janë munduar që të përdorin një pajisje mjaft të rrezikshme për të sulmuar. Fatmirësisht, në të dyja rastet autoritetet kanë reaguar në mënyrën e duhur, dhe sulmet janë parandaluar”, tha Ali Safavi.
Celula aktive terroriste iraniane në Shqipëri u shkatërrua pak ditë më parë. Sipas drejtorit të Përgjithshëm të Policisë së Shtetit, Ardi Veliu, celula kishte planifikuar të kryente sulm terrorist në Shqipëri në mars të 2018-ës, por është parandaluar.
