Për të shmangur dyshimet e policisë, një nënë e re ka përdorur fëmijët e saj për sasinë e konsiderueshme të drogës që fshihte në makinë. Gruaja, identiteti i së cilës ende nuk bëhet me dije, është arrestuar nga policia greke, pasi u kap me 35 kilogramë hashash në makinën që ajo e kishte marrë me qira. Droga ishte e paketuar në 33 pako.
Ajo ka përdorur fëmijët e saj të vegjël, të cilët ndodheshin në sediljen e pasme të makinës, për të shmangur dyshimet e policisë. Shqiptarja përdori dy fëmijët, njërin dy vjeç e gjysmë dhe tjetrin disa muaj, për t’i dhënë asaj pamjen e një nëne të dashur.
Por autoritetet në Igumenicë kishin marrë informacion për drogën, që ndodhej në makinën e nënës shqiptare.
E reja shqiptare u arrestua dhe u dërgua në organet e drejtësisë, me akuzën e “transportit të lëndëve narkotike”. Po ashtu, policia ndaloi edhe pronarin e kompanisë që jepte makina me qira.
