Agjencia Evropiane e Barnave (EMA), ka autorizuar përdorimin e vaksinës anti-covid të prodhuar nga kompania amerikane Johnson & Johnson.
Komiteti i EMA-s, arriti në përfundimin se të dhënat mbi vaksinën ishin të forta dhe përmbushnin të gjitha kriteret për efikasitetin, sigurinë dhe cilësinë. Kjo vaksinë është e katërta e autorizuar në BE për të parandaluar COVID-19 dhe deri tani e vetmja vaksinë që ka nevojë për një dozë të vetme.
“Autoritetet në të gjithë Bashkimin Evropian do të kenë një mundësi tjetër për të luftuar pandeminë dhe për të mbrojtur jetën dhe shëndetin e qytetarëve të tyre. “Kjo është vaksina e parë që mund të përdoret si një dozë e vetme, tha Emer Cooke, Drejtoresha Ekzekutive e EMA.”
Vaksina Johnson & Johnson mund të ruhet në frigoriferë normalë, gjë e cila mund të lehtësojë transportimin e saj. Vaksina bazohet në vektorë viralë si AstraZeneca, Sputnik dhe Reithera. Ajo është 67 % efektive në parandalimin e infektimit me COVID-19.
Në fazën e 3 të provave klinike, vaksina tregoi shkallë të lartë parandaluese ndaj sëmundjeve të rënda, me një efikasitet deri në 85% dhe 57% në rastin e variantit të shfaqur në Afrikën e Jugut.
Në bazë të marrëveshjeve, 200 milion doza duhet të arrijnë në Bashkimin Evropian deri në fund të vitit 2021, 55 milion dozat e para arrijnë tremujorin e dytë të këtij viti.
