Transferimi i Cristiano Ronaldos te Juventusi është përshëndetur nga të gjithë figurat e sportit në Itali dhe jo vetëm. Kjo për faktin se prania e një lojtari të një niveli të tillë, jo vetëm forcon Juventusin, por i bën një reklamë të mirë edhe futbollit italian. Një ndër të fundit që ka komentuar kalimin e CR7-ës është mbrojtësi i kombëtares shqiptare, Elseid Hysaj.
Në një prononcim për mediat italiane, Hysaj e ka vlerësuar maksimalisht figurën e Ronaldos dhe faktin që një lojtar si ai do të luajë në futbollin italian, por kjo gjë nuk e ka penguar që të tregojë edhe njëherë objektivat që klubi i Napolit ka.
“Do të jetë një kampionat shumë i bukur, sidomos me ardhjen e Cristiano Ronaldos te Juventusi dhe Ancelottit te Napoli. Edhe të tjerët po përgatiten shumë mirë, si për shembull Interi.
Ne nuk na pengon askush dhe po përgatitemi që të japim maksimumin si në kampionat, në Ligën e Kampionëve dhe në Kupën e Italisë. Nuk duhet lënë asgjë prapa dhe trajneri Ancelotti, kërkon nga ne mbrojtësit që të bëjmë gjëra të veçanta në fushë”, tha mes të tjerash Hysaj.
