Pas incidentit në hyrje të universitetit “Ismail Qemali” në Vlorë, studentët kanë hyrë në sallë për të nisur takimin me Ramën. Salla është mbushur plot, ndërsa fjalën fillimisht e ka marrë një studente, e cila i ka thënë Ramës që qëllimi i tyre nuk është të rrëzojnë qeverinë, por të plotësohen 8 kërkesat.
“Duhet të kuptohet që ne si studentë, nuk jemi budallenj dhe nuk kemi protestuar këtu. Nuk jemi me parti politike ne që kemi ndenjur disa ditë në shi. Ju shohim si të vetmin njeri që mund të bëjë diçka në këtë vend. Ne nuk kemi kërkuar të rrëzojmë qeveri. Ne mungojmë në seminare se të shumtën e kohës jemi sëmurë, as ngrohje nuk ka. Pedagogët nuk dinë gjysmë llafi, pa përgjithësuar. Ju i keni 8 pikat të zezën mbi të bardhë. Duhet të thoni vetëm kaq, po ose jo. Nëse pranoni, mund të ulemi të dialogojmë si qysh pse tek e të gjitha me radhë”, ka thënë vajza.
Më tej fjalën e ka marrë një tjetër student, i cili e ka ironizuar kryeministrin me të cilin ka shkëmbyer disa batuta, e më pas i ka shprehur edhe simpatinë, teksa i ka thënë se e ka votuar prandaj të plotësojë kërkesat.
“Jam ngelës i ekselencës me mesatare 9.2”, ironizoi studenti.
“Të dëgjojmë njëri tjetrin. S’ka nevojë për tifozllëk. Për tifozllëk, Flamurtari ndeshjen e ka të dielën”, është përgjigjur Rama pas duartrokitjeve, duke shkaktuar të qeshura.
Studenti vijon: “Çështja kryesore është që i keni dhënë autonomi universitetit. Fajin nuk e ka universiteti, mos është kjo një mënyrë për t’u shfajësuar juve? S’kemi ç’të diskutojmë, këto kërkesa bëhen ose jo. Nuk po silleni në mënyrë korrekte. Kërkoni dialog, kur jeni në një takim ballë për ballë ju të mbushni mendjen.”
Rama: Qetësi. Mos t’i hyjmë me batuta se pastaj e dini kush fiton!
Studenti: Ne ju kemi votuar, kemi një pëlqim kundrejt jush. Mos na detyroni ta kthejmë atë në formë urrejtje. Mos e agravoni situatën. Studentët do ju marrin PS, Lsi e PD e do ju dërgojnë, e dini vet siç tha Blendi. Jepni zgjidhje.
Rama ka dashur të marrë fjalën, por kjo nuk është pranuar nga një pjesë e studentëve, të cilët kanë braktisur sallën.
“Kush nuk do të dëgjojë, të largohet”, tha Rama, ndërsa studentët kanë ikur me thirrjet:
“S’ka dialog, s’ka negociata”. “E duam Shqipërinë, si gjithë Europa”.
“Vetëm Europë nuk është kjo, vetëm në Europë nuk ndodh. Largohuni na lini të vazhdojmë me pjesën tjetër që duan të flasin”, vijoi kryeministri./ TIRANA TODAY
