Kanë kaluar plot 2 vite që nga ngjarja makabre që ndodhi më 31 gusht të vitit 2017, ku gjyqtarja Fildes Hafizi, u ekzekutua nga ish-bashkëshorti i saj, Fadil Kasemi.
“Jetoj me ty në mendje, zemër e shpirt”, me këto fjalë e kujton sot gjyqtaren, motra e saj Amela.
Përmes një statusi në Facebook, ajo shprehet se i duket e pabesueshme se si kanë kaluar 2 vite nga ajo ngjarje dhe thotë se për të koha ka ndaluar në atë ditë.
“Nuk më besohet që kanë kaluar dy vite pa ty. Ndihem e mpirë. Për mua koha ka ndaluar në këtë ditë. Jetoj me ty në mendje, zemër e shpirt. Nuk të harroj në asnjë çast të jetës sime e sot dua që të të kujtojnë edhe të tjerët. Je dashuria e jetës sime dhe të dua në përjetësi”, shkruan ajo në postimin e saj në Facebook.
Fildes Hafizi u ekzekutua pranë shtëpisë ku banonte në Tiranë, në zonën e Xhamllikut.
Ngjarja erdhi pas shumë vitesh konfliktesh, për të cilat çifti dhe ishte divorcuar. Madje, gjyqtarja ishte kanosur nga Kasemi vazhdimisht, duke kujtuar këtu ngjarjen te “Shkëmbi i Kavajës”, ku 54-vjeçari ishte edhe i armatosur.
Gjyqtarja kishte kërkuar edhe transferim në Tiranë, por KLD e kishte vendosur në Shkodër, rrethin më të largët që ajo kishte kërkuar, pasi ndihej e kërcënuar nga ish-bashkëshorti.
