Studentët të papërmbajtur kanë dhunuar sot pedagogun e tyre, duke mos i dhënë edhe të drejtën që të flasë. Pasi u dëbua me forcë pedagogu Jani Marka, pjesë e Lëvizjes për Universitetin, një studente ka denoncuar për “News 24”, se profesori ka kërcënuar me jetë një protestues.
“Pedagogu ka kërcënuar me jetë një student brenda turmës. E dëgjuam të gjithë shumë mirë. Do shkojë pas pak ta denoncojë në polici”, u shpreh studentja ‘live’, ndërsa sqaroi se profesori u dëbua pasi bëri thirrje për përçarje dhe për dhunë.
Nga ana tjetër, vetë pedagogu tha se është mjaft e rëndë kjo që ndodhi, dhe se atë nuk duhet që ta cilësojnë si një armik. Në një prononcim për median, ai i ka bërë thirrje Partisë Demokratike që të tërheqë eksponentët, që sipas tij, po përçajnë tubimin.
“Ne nuk jemi parti. Kemi katër vite si lëvizje për Universitetin, kemi qëllim vetëm universitetin. Protesta uroj që të vijojë, dhe ftoj PD që të tërheqë eksponentët nga protesta.
Gjithë ky plan mesa duket që dje, ditën e 8 Dhjetorit, Lulzim Basha dhe Monika Kryemadhi të organizonin një protestë të madhe. Për fat të mirë, turma nuk shkoi atje.
Kush po e përçan protestën? Është e thjeshtë, janë forumet partiake. Ne do t’i demaskojmë. Ky vend është vjedhur. Nuk e kemi vjedhur. Këta që menaxhojnë miliardë lekë shqiptarësh, atje vjedhin. Nuk e meriton fytyra ime të trajtohet kështu, që kam një shtëpi atje tek “Rruga e Dibrës”, dhe çoj djalin në këmbë në shkollë.
Unë njeri i dhunshëm? Kam ngrënë grushta. Pse nuk më lanë të flisja? Është e thjeshtë, janë forumet partiake. Ne do t’i demaskojmë”, tha ai.
https://tiranatoday.com/bente-thirrje-per-ja-kush-eshte-profesori-qe-u-nga-studentet/
