Vetëm pak ditë pasi Shpëtim Idrizi, deklaroi ndarjen dhe largimin nga koalicioni me PS-në dhe Ramën, kreu demokrat Lulzim Basha ka deklaruar sot publikisht se mirëpret kërkesën e PDIU-së për negociata me PD-në.
“Në këtë kuadër mirëpres kërkesën e Partisë për Drejtësi Integrim dhe Unitet, për të nisur bisedimet me Partinë Demokratike dhe opozitën, bazuar në parimet dhe objektivat e shpallura, për çlirimin e vendit nga bashkëqeverisja me krimin, të vendosjes së interesit të shqiptarëve, të interesit të qytetarëve shqiptarë dhe interesave kombëtare, mbi interesat e bandës në pushtet dhe të formulimit të zgjidhjeve të përbashkëta, për t’i dhënë fund emergjencës kombëtare ku e ka futur vendin Edi Rama dhe banda me të cilën ai bashkëqeveris”, deklaroi Basha, në mbledhjen e sotme në Durrës.
PDIU braktisi koalicionin qeverisës, duke zyrtarizuar atë që Shpëtim Idrizi kishte deklaruar në emisionin “Top Talk”. “Nuk dua t’iu referohem emrave të përveçëm, por ajo që mund të them qartësisht sot është se, në kushtet kur kjo mazhorancë e ka marrë të gjithë tepsinë për vete dhe deklaron se do të hyjë e vetme në zgjedhje, e në kushtet që për çështjen e shqiptarëve të Çamërisë kemi ndryshim 180 gradë të qëndrimit të kësaj mazhorance dhe të Edi Ramës, në mbledhjen e para dy ditëve të Kryesisë së PDIU-së vendosëm mbledhjen e Këshillit Kombëtar sot për të diskutuar për kalimin në opozitën zyrtare, dhe mundësitë e negociatave me Partinë Demokratike, për t’u rreshtuar në këto zgjedhje me koalicionin opozitar”, deklaronte Shpëtim Idrizi në “Top Talk”.
