Pas deputetit Enkelejd Alibeaj, zëri i radhës nga PD-ja është Oerd Bylykbashi, i cili i mëshon fort faktit se procesi i Vettingut po zbatohet me dy standarde. Ai u shpreh se po bëhet selektivitet politik, ndërsa akuzon kryeministri Rama se po tenton të kapë sistemin e drejtësisë.
Edhe më herët, Partia Demokratike ka hedhur akuza mbi Ramën, se po bën çdo përpjekje për të vënë nën kontroll sistemin e drejtësisë, duke kapur institucionet.
Për ta, Reforma në Drejtësi duhet mbështetur në shtylla kryesore, në pavarësinë e gjyqësorit nga politika, si dhe nga konsolidimi i sistemit të drejtësisë, sa i përket përgjegjësisë dhe llogaridhënies para qytetarëve.
Demokratët janë të bindur se qeveria nuk ka treguar vizion dhe platformë për Reformën në Drejtësi. Bylykbashi, i ftuar në rubrikën “Opinion” në “News24”, ka komentuar rikonfirmimin në detyrë të kryetarit të Gjykatës Kushtetuese, Xhezair Zaganjori.
“Gjykata Kushtuese është themeli i garantimit të së drejtës dhe shtetit ligjor, dhe kur bie themeli, ngrehina ka rënë. Sot Gjykata Kushtetuese është e vdekur, kanë lënë kryetarin për ta mbajtur derën hapur”, tha deputeti demokrat.
Më tej, ai shtoi se: “Po kështu situata paraqitet e vështirë edhe më Gjykatën e Lartë. Por për një vit mund të kemi probleme edhe me Gjykatën e Apelit për shkak të Vettingut, pasi shumë gjyqtarë mund të rezultojnë të korruptuar.
Nëse ata largohen nga sistemi, atëherë gjykatat e nivelit të parë duhet të ulin tempin, pasi s’do ketë apel. E nëse kjo ndodh, ku do të drejtohen qytetarët për çështjen e tyre? Ndaj kjo do të sjellë në rënie të sistemit të drejtësisë”.
Konfirmohet në detyrë Xhezair Zaganjori
Kreu i Gjykatës së Lartë ka arritur të kalojë provën në të treja kriteret e Vettingut, si për anën profesionale, pasurinë dhe figurën morale, duke konfirmuar staturën e një gjyqtari korrekt të vendit. Zaganjori njihet si një nga mbështetësit e hapur të Reformës në Drejtësi.
