Deputeti Enkelejd Alibeaj ka kërkuar që në nisje të seancës 30 minuta pushim me pretendimin se opozita do të zhvillojë një mbledhje grupi për çështjen e rendit të ditës.
Por, kjo kërkesë u kundërshtua nga kreu i grupit të Partisë Socialiste Taulant Balla, i cili tha se po i bëjnë qesharake punimet e Kuvendit.
DEBATI
Alibeaj: Do bëjmë një mbledhje grupi 30 minuta, prandaj na duhet 30 minuta pushim e të fillojmë më vonë seancën.
Balla: Kërkesa për pushim është gjithmonë në lidhje me rendin e ditës. Ju lutem mos ta bëjmë qesharake punën e Kuvendit. Ne të vijojmë me punën normale, në momentin që ju të jeni prezent në sallë le të fillojmë. Thuajeni troç, keni vënë Lulzim Bashën të parin në listë dhe ai nuk vjen dot para orës 10 dhe jemi në rregull.
Vasili: Është qesharake dhe e papranueshme mungesa e ministrave në Komisionet Parlamentare. Sa për kërkesën për pushim të PD, kjo e drejtë është e garantuar dhe kjo mundësi është përdorur dhe shpërdoruar sa herë ti dojë qejfi edhe grupit të PS, nëse do merremi me këtë 20 minuta pushim, atëherë lëreni rregulloren e thuajeni se rregullorja është e jona dhe s’keni pse rrini hiç.
Ruçi: Zoti Vasili dje ke munguar dhe nëse do të njohësh me pozicionin tim si anëtar i konferencës së kryetarëve merr procesverbalin dhe lexoje, letrat që më ke drejtuar i kam konsideruar dhe u jam përgjigjur po me shkrim.
