Me anë të një prononcimi për mediat, nënkryetari i PD, Edi Paloka, ka hedhur akuza të ripërsëritura ndaj kryeministrit Rama, se po mbron me çdo kusht trafikantët.
Duke iu referuar arrestimit dje në Igumenicë nga policia greke të Edmond Begos, pasi rezulton i dënuar nga Italia për ‘trafik droge’, Paloka thotë se policia shqiptare ‘mbylli sytë’ për anëtarin e bandës së Aldo Bares.
Paloka duke treguar tërë rrjedhën e ngjarjes, thotë se është vënë në pranga nga policia greke një prej eksponentëve të krimit të organizuar, anëtari i bandës së Aldo Bares, i dënuar në Itali me 21 vite burg për ‘trafik ndërkombëtar droge’. Ndonëse ka qënë i shpallur në kërkim nga autoritetet italiane, biznesmeni jetonte i lirë në Shqipëri, ku drejtonte edhe një biznes ndërtimi.
“Mbrëmë vonë u mësua se policia greke ka arrestuar një prej eksponentëve të krimit të organizuar, anëtarit të bandës së Aldo Bares, i dënuar në Itali me 21 vite burg për ‘trafik ndërkombëtar droge’, biznesmenin e lidhur ngushtë me pushtetin e Edi Ramës, të quajtur Edmond Bego.
Pavarësisht se ka qenë i shpallur në kërkim nga autoritetet italiane, trafikanti ndërkombëtar i drogës, anëtar i bandës se Aldo Bares, jetonte i lirë në Shqipëri, ku drejtonte edhe një biznes ndërtimi nën mbrojtjen politike të kësaj qeverie.
Nëse Edmond Bego nuk do ishte nisur me pushime në Greqi, sot shqiptarët nuk do dinin se një kriminel i rrezikshëm ka vazhduar të pasurohet lirisht duke u lidhur direkt me disa nga njerëzit më të pushtetshëm në vend, edhe pse ishte i dënuar për ‘trafik ndërkombëtar droge në Itali”, tha Paloka.
Më herët ka reaguar përmes një postimi edhe gazetari Flamur Vezaj, i cili e konsideron si një ‘peshk të madh’. Ai thotë se biznesmeni ka lidhje të ngushta me politikanët shqiptarë.
https://tiranatoday.com/peshku-i-madh-mbrohet-nga-politikanet-shqiptare-biznesmeni-me-4-emra-mik-i-rucit-e-taulant-balles/
