Deputeti i Partisë Demokratike, Luçiano Boçi ka akuzuar qeverinë se po mban “peng” 36 mijë mësues të arsimit parauniversitar, të cilët po punojnë pa kontratë punë.
Boçi tha se qeveria po shkel ligjin, pasi mund t’i hedhë ata në rrugë në çdo moment, gjë që sipas tij edhe ka ndodhur.
Sipas deputetit kjo ndodh edhe sepse qeveria nuk dëshiron t’u paguajë atyre pagën e 13-të dhe as t’u japë shpërblimin e fundvitit.
FJALA E BOÇIT:
36 mijë mësues të arsimit parauniversitar janë pa kontratë pune. Ministria e Arsimit refuzon të nënshkruajë kontratën duke shkelur ligjin. Mësuesit vijojnë punën pa kontratë që nga 21 maji.
Ministria mund të marrë në çdo kohë vendimin për largimin nga puna, siç edhe ka ndodhur.
Kjo ndodh për dy arsye: qeveria refuzon t’u paguajë mësuesve pagën e 13-të dhe refuzon t’u paguajë atyre shpërblimin e fundvitit.
Qeveria paguan për check-up pa u bërë fare analizat, veprimi me dy standarde i qeverisë është fare i qartë.
Arsimtarët lihen të pasigurtë dhe të papaguar./ Tirana Today
