Deputeti i PD-së, Flamur Noka dhe ai i LSI-së, Luan Rama kanë braktisur punimet e Komisionit të Sigurisë.
Noka deklaroi nga ambientet e jashtme të Kuvendit se opozita do të ndërmarrë aksionin e saj opozitar, duke mos dhënë detaje të tjera.
“Opozita do ndërmarrë aksion politik ndaj kësaj qeverie kriminale. Kemi platformën tonë. Një qeveri që lufton mafian, krimin dhe të garantojë zgjedhje të lira. Me këtë qeveri nuk pranojmë që të ecim në normalitet. Ne jemi ndryshe nga opozita e para 5 viteve, pasi nuk djegim Shqipërinë. Këto janë hapat e parë të një reagimi që do të bëhet më i detajuar aksioni opozitar”, tha Noka.
Ndërkohë, deputeti i LSI-së ka folur më gjatë, teksa tha se komisioni ishte i pavlerë prandaj qëndrimi aty ishte pa kuptim. Luan Rama deklaroi se ka propozuar një cikël seancash dëgjimore me drejtorin e përgjithshëm të Policisë Shtetit, drejtorin e SHISH dhe shefin e ushtrisë, por kjo kërkesë e tij është kundërshtuar nga kryetarja e këtij komisioni, Ermonela Felaj.
Po ashtu, zv/kryetari i LSI-së tha se LSI është e vendosur për zbardhjen e të vërettës së mosfunksionimit të sistemit të kontrollit dhe hapësirës detare:
Luan Rama: Me shumë konstruktivitet dhe vullnetin për të kontribuar për të zbardhur standardin e mosfunksionimit të radarëve, bëra propozim që të përfshihet në rendin e ditës një seancë dëgjimore me titullarët kryesore të institucioneve përgjegjësisë, konkretisht me drejtorin e përgjithshëm të Policisë së Shtetit, me shefin e shtabit të përgjithshëm të ushtrisë dhe me prokurorin.
Propozimi im u arsyetua mbi bazën e ndjeshmërisë që ka kjo çështje që lidhet me sigurinë kombëtare, por janë cenuar standardet e sigurisë, në mënyrë paradoksale u gjet një pretekst që kërkesa duhet përgatitur me shkrim dhe duhet paraqitur nga një grup deputetësh.
Qëndrimi kundër propozimit tim për të garantuar kontrollin civil, transparencën mbi kontratat. Në këto kushte qëndrimi në komision ishte i pavlerë. Unë dhe LSI jemi të vendosur për të zbardhur deri në një të vërtetën e mosfunksionimit të sistemit të kontrollit dhe hapësirës detare të radarëve.
