Lulzim Basha ka sfiduar zërat brenda PD-së lidhur me kërkesën e tyre për dorëheqje. Duke iu përgjigjur në mënyrë të tërthortë kërkesës së Kadillit, Ristanit e Nishanit për dorëheqje të parevokueshme, si dhe kritikave të anëtarëve të tjerë në Kryesi e Këshill lidhur me rezultatin e 25 Prillit, Basha u kërkoi anëtarëve të zgjedhin mes dy alternativave. “Zgjidhni dhe dua t’ju shoh të gjithëve në sy. Ose zgjedhjet janë të vjedhura dhe vazhdojmë në betejë, ose nëse për ju janë në rregull, atëherë unë jap dorëheqjen tani”, tha Basha para anëtarëve.
Kërkesat nga Kadilli e Ristani
I pari në mbledhjen e kryesisë, që kërkoi largimin e tij nga drejtimi I PD-së, ishte Fatbardh Kadilli, që është shprehur për kandidim në krye të PD-së. Ndërkaq, Arben Ristani ka vënë në dukje faktin që edhe për 4 vite Partia Demokratike do të jetë në opozitë dhe se tashmë Basha nuk mund të vijojë me kostumin e humbësit të sdrejtojë opozitën. “Mund ta duartrokasim sa të duam kryetarin apo atë që mbështet kryetarin, por dhe 4 vjet të tjera jemi në opozitë. Duhet të kemi shpresë të fitojmë pas 4 vjetëve dhe jo të vijmë prapë këtu si sot. Nga Rama nuk presim asgjë tjetër. Rama i tillë mbetet. Kryetari ka thënë se “po ma hodhe njëherë është faji jot, po ma hodhe dy është faji im. Tani meqë ta hodhi dy herë, ik. Ke humbur tre here. Dhe një herë që fitove e dimë të gjithë si fitove”, u shpreh Ristani, duke e konsideruar procesin e afrimit të zgjedhjeve për kryetarin si “të nxituar”.
Nishani: Basha, sillu me burrni
Kreu I Këshillit Kombëtar në PD, ish Presidenti Nishani, ka parashtruar arsyet se përse Basha duhet të largohet nga drejtimi I partisë. “Z.Basha jep dorëheqjen e parevokueshme nga drejtimi i Partisë përpara se të shpallësh zgjedhje për kryetar partie. Por a është kjo zgjidhja e vetme? Padyshim që jo. Duhet ngritur një komision real për analizë kudo nëpër degë e statut të ri, për të krijuar këshill përsëri, senat, referendum. Komisioni mund të ketë marrë vendime të gabuara, por është e pamoralshme t’u thuash të përjashtuarve se komisioni nuk ka tagër, kontratën e keni me Lulzim Bashën. Lideri është lider,sillet me burrni. Mund ta kishte deklaruar të dështuar komisionin”, është shprehur Nishani gjatë fjalës së tij.
Miratohet komisoni për zgjedhjet
Këshilli Kombëtar i Partisë Demokratike ka miratuar 13 Qershorin për datën e zgjedhjeve të reja për kreun e kësaj partie si dhe propozimin e kryesisë për Komisionin që do të jetë përgjegjës për zgjedhjet për kryetarin e demokratëve.
Komisioni Zgjedhor për 13 Qershorin
Kryetar
Jemin Gjana
Anëtarë
Albana Vokshi
Belind Këlliçi
Eno Bozdo
Mimoza Hasekiu
Albert Avduli
Gjoke Vuksani
Ervin Minarolli (ndihmës)
Lulzim Omuri (ndihmës)
Kadilli: do vazhdoj garën
Kandidati i shpallur për në kreun e PD-së, ka deklaruar pas mbledhjes së Kryesisë dhe Këshillit se, zërat kritikë arritën t’I artikulonin argumentet e tyre në mbledhje, por zërat e tyre për të kërkuar dorëheqjen e Bashës nuk gjetën mbështetje. Megjithatë, ai vlerësoi nisjen e procesit të zgjedhjes dhe hapjen e garës, duke deklaruar se është i vendosur që t’i qëndrojë deri në fund projektit për një PD të pastër, të hapur dhe fituese. “Qoftë Kryesia, qoftë Këshilli diskutuan gjatë dhe më përgjegjësi. Pavarësisht vendimit, zërat kritikë artikuluan qartë kërkesën për dorëheqjen e kryetarit. Zërat kritikë nuk u dëgjuan, por vendimi i kryesisë dhe këshillit është të hapet gara. Sado e pabarabartë gara, sado jashtë standardeve, jam i vendosur ti qëndroj deri në fund projektit për një PD të pastër, të bashkuar, të hapur dhe fituese. Duhet ti japim shpresë sot të gjithë shqiptarëve, një PD më të madhe se kryetari, se vetë PD, për një PD të shekullit të 21-të. Nuk ndryshojmë kryetarin, ndryshojmë veten. Që përballë krimit të kemi me vete qytetarin.Jam për qytetarin që është qytetar politik, jo që e trajtojmë me oferta materiale. Do ia dalim, demokracia është e vështirë, rrugë e gjatë, një brez larg prandaj do e mbrojmë. Do i shkoj deri në fund përtëritjes së PD, por gjithë shoqërisë shqiptare. ‘’- tha Kadilli./ Tirana Today
