Deputeti demokrat, një ndër emrat e lakuar më së shumti si kandidat për kreun e ri të Partisë Demokratike, Astrit Patozi deklaroi sonte gjatë një interviste televizive, se nuk do të kandidojë për kreun e ri të PD-së.
Vendimin e argumentoi me deklaratën: “Lulzim Basha është bërë gati të hapë një farsë elektorale, në shkelje të rëndë të statutit”.
Patozi tha se kryetari vetëpezulluar ka kryer shkelje të rëndë duke e konsideruar veten të ngrirë, pasi një gjë e tillë është e pabazuar në statut dhe në asnjë praktikë tjetër kombëtare apo ndërkombëtare.
Sipas tij, Basha duhej të jepte dorëheqje të parevokueshme , pasi po e trajton partinë si pronë.
“Lulzim Basha po e rrëmben dhe po e çon në shpi dhe po e ndan me kunatin e vjehrrin. Partinë atij ia dhuruan në 2013, e vodhi me marrëveshjen me Ramën dhe me listat e hartuara, duke injoruar çdo forum tjetër, sikur të ishte mbret” , theksoi Patozi teksa i kujtoi atij se është i përkëdheluri i Berishës.
Patozi nuk beson Berisha i ka dhënë mbështetje Bashës në rikandidim, por sipas tij, ka një përpjekje për të qenë neutral në parim. Por, thotë ai, Berisha kërkoi që për humbjen katastrofike të kishte edhe përgjegjës të tjerë, gjë që nuk është e vërtetë.
