Heshtja e Lulzim Bashës ka provokuar debat në opinionin publik dhe shumëkush po ngre pyetje nga të ndryshmet. Astrit Patozi i ka disa përgjigje. Për këtë arsye, nuk ka munguar të shkruajë sërish mbi kundërshtarin e tij kryesor në Partinë Demokratike. Përmes një analize në profilin e tij në Facebook, Patozi ironizon gjithë heshtjen e Lulzim Bashës pas zgjedhjes së këtij të fundit në krye të Partisë Demokratike.
Sipas Patozit, Basha shkërmoqi opozitën që me marrëveshjen e 17 majit, dhe me rizgjedhjen e tij në krye të selisë blu. Ndaj, sipas Patozit, t’i kërkosh Bashës të reagojë ndaj situatës aktuale të vendit është e tepërt. Patozi e rrit dozën e ironisë kur thotë se ndoshta nga shtatori me shirat mund të rikthehet edhe Basha, të cilit i kanë mbaruar fjalët në këto ditë të nxehta gushti.
“Lulzim Bashës i janë mbaruar fjalët dhe po shijon i qetë pushimet e këtij gushti përvëlues, sepse ka arritur të vetmin objektiv, që i kishte vendosur vetes, të rimerrte edhe një herë timonin e Partisë Demokratike, edhe pse prej autobusit të saj kishte zbritur gjysma e pasagjerëve. I pari e kishte betejën më 25 qershor, ndërsa i dyti më 22 korrik. Të dy kanë fituar në mënyrën e tyre, ndaj duhet pritur shtatori, se mbase shirat sjellin me vete jo vetëm fundin e vapës dhe shuarjen e zjarreve, por mbase edhe ndezjen e opozitës së Lulzim Bashës”, shkruan Patozi.
