Drejtoria e Përgjithshme e Shërbimeve të Transportit Rrugor ka dhënë një lajm të mirë për të gjithë ata që do të aplikojnë për të marrë patentën.
DPSHTRR ka informuar se janë krijuar disa lehtësira. Kështu, nuk do të ketë më riaplikim për test teorie nëse e ke marrë atë, por ke ngelur në praktikë dhe anasjelltas.
Ky vendim do të shmangë pagesën e tarifave dhe shpenzimin e kohës. Kjo do të thotë se do të shmanget edhe dhënia e ryshfetit, teksa shumë persona paguanin nën dorë për të kaluar testin në mënyrë që të mos aplikonin sërish nga e para pas mbetjes në 5 provat.
“Jo përsëri pagesa, tarifa e shpenzim kohe nga e para. Do ritestohesh vetëm për testin ku nuk je kalues! Gjithashtu i tërë procesi i radhës së testimeve do informatizohet”, thuhet në një njoftim.
Po ashtu, DPSHTRR bën me dije se duke nisur nga nesër nuk do kryejë asnjë shërbim për mjetet që kanë errësuar xhamin e përparmë dhe xhamat e parë anësorë.
“Nga 7.01.2019 i ndalojmë çdo shërbim automjeteve që kanë errësuar xhamin e përparmë dhe xhamat e parë anësorë! Pa dallim: Shefa, VIP-a, të Fortë! Në bashkëpunim me Task Forcën e Transportit Rrugor dhe Policinë Rrugore po skedojmë dhe do penalizohen edhe “ustallarët” dhe serviset!”– thuhet nga Drejtoria e Përgjithshme e Shërbimeve të Transportit Rrugor.
