Kryetari i Bashkisë së Tiranës, Erion Veliaj ka treguar se nuk dakordësohet me presidentin Ilir Meta kur bëhet fjalë për pluralizmin dhe shmangien e betejave.
Teksa ishte i ftuar në emisionin “Real Story”, kryebashkiaku deklaroi se nuk ka asgjë personale me Metën, por nënvizoi se të gjithë duhet të jenë të ndershëm kur flasin për demokracinë.
“Unë s’kam gjë personale dhe kush më njeh e di që unë me njerëzit bëj debat vetëm për çështje pune. Edhe në këtë rast nuk kam gjë personale, thjesht them që gjërat duhen thënë siç janë. Një kryetar bashkie merr shumicën e kohës të pastrojë monumentet nga bingot, bastet dhe llotot e deputetëve të Ilir Metës, duhet ta themi. Pra, o jemi patriotë dhe o jemi me partizanët, dhe o e çmojmë luftën, ose ne nuk mund të themi tjetër gjë në Pezë, ndërkohë që të gjithë njerëzit e partisë të jenë duke zaptuar monumentet. Rasti i Vojo Kushit, kur deputetët e LSI i dilnin përpara fadromave…
Tani unë e kuptoj që Astiri doli në modë, e kuptoj kur e bën një militant dhe mitingash partie, por kur e bën një deputet. Kështu që, sot kisha një apel që ne këto gjëra që i themi këtu, duhet t’i respektojmë, sidomos kur trumpetojmë që prirja jonë autentike, antifashiste evropiane, qoftë edhe në vende si Peza. Te bësh analogji që sot me demek s’kemi pluralizëm dhe unë thashë, përgjigja ime ndaj presidentit ishte: Patjetër!
Por pluralizëm jo vetëm në tavolinë, jo vetëm në fjalime, por pluralizëm aty ku bëhen betejat, disa beteja janë në kutitë e votimit. Të thuash duam pluralizëm dhe t’i shmangesh betejave, kjo kërcet, këto ishin dy sqarime që unë doja ti bëja sot me presidentin”, tha Veliaj.
