Shqipëria do të krijojë regjistrin e organizatave jofitimprurëse në një përpjekje për të plotësuar rekomandimet e bëra nga Moneyval për të minimizuar riskun e pastrimit të parave. Ministria e Drejtësisë tashmë ka gati draftin e parë të projektligjit “Për regjistrimin e orgnizatave joftitimpruresë” i cili është në fazë konsultimi teksa vihet theksi në të gjithë elementët që do të shoqërojnë këtë proces.
“Nga Komiteti i Ekspertëve për Vlerësimin e Masave kundër pastrimit të parave dhe financimit të terrorizmit (MONEYVAL) është vlerësuar dhe rekomanduar krijimi i regjistrit elektronik dhe përmirësimi i procedurave të regjistrimit të OJF-ve. Në Rekomandimet e Raportit është vlerësuar se vendi ynë nuk ka ndonjë politikë të qartë për të promovuar llogaridhënien, integritetin dhe besimin publik në administrimin dhe menaxhimin e OJF-ve, duke patur një qasje të kufizuar ndaj sektorit të OJF-ve dhe komunitetit të donatorëve për çështjet e financimit nga terrorizmi” thuhet në relacionin e projektligjit.
I njëjti sjell në vëmendje se raporti i Moenyval cilësonte se nuk ka asnjë dokument mbi praktikat më të mira që të jetë hartuar nga Shqipëria me përfshirjen e OJF-ve, si dhe nuk janë ndërmarrë hapa për promovimin, mbikëqyrjen e riskut ose monitorimin e OJF-ve. “Prandaj kjo nismë sigurisht vjen edhe nga rëndësia e përmbushjes së Rekomandimeve të Komitetit të Ekspertëve të MONEYVAL lidhur me këtë fushë” vijon më tej relacioni.
Dokumenti bën me dije se veçanërisht për OJF-të jashtë Tiranës, i gjithë procesi i regjistrimit dhe koha e shpenzuar kanë një kosto totale prej 250 deri në 300 Euro.
Sistemi aktual i regjistrave të mbajtur manualisht është jo efektiv dhe i pamjaftueshëm për të gjeneruar informacion të saktë dhe në kohën e duhur për statusin dhe aktivitetet e OJF-ve.
”Prandaj reformimi i procesit të regjistrimit është i domosdoshëm.
Institucioni i regjistrimit duhet të ofrojë shërbime të shpejta, transparente dhe jo të kushtueshme për OJF-të. Procesi i regjistrimit nuk duhet të krijojë kosto të panevojshme financiare dhe administrative për OJF-të larg Tiranës” thuhet në relacion./Monitor
