Kohët e fundit sulmet mes PS-së dhe LSI-së janë rritur ndjeshëm, edhe pse bashkëqeverisën për katër vite me radhë. Jo vetëm kaq, por “gjendja” ka arritur deri sa LSI ka paditur kryeministrin Rama.
Madje, është përfolur edhe për një koalicion të mundshëm PD-PS, i cili është më i besueshëm se një koalicion të dytë PS-LSI për shkak të sulmeve të panumërta mes Ramës dhe Metës.
Por, kreu i PDS, Paskal Milo beson se pas zgjedhjeve të 25 qershorit do të ketë sërish bashkëqeverisje PS-LSI.
I ftuar në Report Tv, Milo tha se ky koalicion është më i natyrshëm sesa një bashkëpunim i PS-së me PD-në, i cili do të kontestohej në radhë të parë nga elektorati i dy forcave politike.
“Një koalicion me LSI për PS-në është e keqja më e vogël se një koalicion me PD-në. Në rastin e parë kemi një koalicion që ka funksionuar, ndërsa me PD është i panatyrshëm, ka një hendek, forcat ndahen me njëra-tjetrën, forca sociale që janë kundër njëra-tjetrës, s’do pritej mirë nga militantët e dy partive. Këtu s’jemi në Gjermani, as në ndonjë vend europian demokratik ku bashkëqeverisja është normë, pranohet, këtu jemi në një Shqipëri të varfër, me shumë korrupsion. Të parët do ishin militantët që s’do pranonin. Me hir ose me pahir, PS-LSI do bashkëqeverisin”, u shpreh Milo.
