Kryetari i VMRO-DPMNE-së, Nikolla Gruevski nëpërmjet rrjeteve sociale ka dërguar disa mesazhe deri tek kandidatet për kryetar të ardhshëm të partisë, bashkëpunëtorëve dhe delegatëve në Kongresin në të cilin do të zgjidhet lideri i ri i partisë. Zgjedhjet e fundit në Maqedoni e renditën shumë dobët më vota VMRO-DPMNE. Ishte rezultati më i keq qysh kur Gruevsi erdhi në krye të saj.
Gruevski shkruan se kandidatët nuk duhet të ndahen në bazë të statusit të tyre dhe funksionit në parti.
“Çdo anëtar i partisë i cili futet në garë duhet të ketë trajtim të njëjtë, shanse të njëjtat për ta prezantuar veten dhe çdo delegat duhet të jetë i hapur për kandidatët. Nuk duhet të ketë asnjë privilegj për ata të cilët për momentin janë në funksione më të larta të partisë në krahasim me ata që nuk janë”, deklaroi Gruevski.
Më tej ai shkruan se kandidatet që janë në funksione partiake nuk duhet të shfrytëzojnë infrastrukturën partiake në kontekst të paraqitjes së tyre, grumbullimit të nënshkrimeve dhe çfarëdolloj aktiviteti që do tu ndihmonte në fushatën e tyre për kryetar të partisë, shkruan Shenja.
“Apeloj tek kandidatet për kryetar të partisë në procesin e grumbullimit të nënshkrimeve të mos shfrytëzojnë forma të presionit, frikësime, kërcënime, mashtrime ose çfarëdolloj forte dhe mënyre gjatë grumbullimit të nënshkrimeve,” tha Gruevski duke shtuar se asnjë nga kandidatët mos të përdor emrin e tij, ngase ai nuk i ka dhënë përkrahje ekskluzive asnjërit prej kandidatëve.
Ai shton se gara duhet të jetë e ndershme dhe se nuk duhet harruar se partia ka një ideologji të përbashkët dhe se pas asaj pason lufta kundër kundërshtarit të përbashkët, LSDM-së.
