Qindra qytetarë në mesnatë ishin në Katedralen Ortodokse ‘Ringjallja e Krishtit’ në Tiranë. Mesha u kremtua nga Fortlumturia e tij, Kryepeshkopi Janullatos.
Ky është edhe viti i parë që Kryepeshkopi e drejton këtë shërbesë Pashke si shtetas Shqiptar, por e mbajti atë sërish në Greqisht.
“Krishti u Ngjall dhe ju diuhet të gëzoni të gjithë për besimin tuaj ndaj Zotit, për fitoren e së mirës ndaj të keqës”, tha ndër të tjera Janullatos.
Kryepeshkopi Janullatos uroi qindra besimtarë të mbledhur para Katedrales, me lutje ndaj Zotit, duke respektuar të gjitha ritet e kësaj feste. Duke u lutur për paqë, mirësi e harmoni në familjet e tyre, besimtarët ndezën qirinj për të marrë bekimin e Zotit.
Numri i besimtarëve ishte jashtëzakonisht i madh, pasi shumë prej tyre e kanë ndjekur lutje jashtë ambjenteve të Katedrales.
Janullatos ka bërë thirrje për t’u lutur për më shumë gëzim, dashuri dhe paqe. “Veçanërisht në epoka të vështira, si kjo e sotmja, ku dëshpërimi i thellë dhe shqetësimi janë përhapur në mbarë shoqërinë dhe ku zhgënjimi i shtyp zemrat, çdo besimtar ftohet të marrë mesazhin ngjallësor të gëzimit, të dashurisë dhe të paqes dhe ta transmetojë tek ata që ndodhen afër dhe larg tij. Ejani të ngazëllohemi më Zotin, i cili dërrmoi pushtetin e vdekjes dhe ndriçoi gjindjen njerëzore.
Ejani të gëzojmë për besimin tonë në fitoren e drejtësisë mbi padrejtësinë, të së vërtetës mbi gënjeshtrën, të jetës mbi vdekjen. Ejani, si gjymtyrë të Kishës, si qeliza të Trupit Mistik të Krishtit, të marrim pjesë në veprën e Tij rinovuese, në ofrimin e dashurisë, të optimizmit dhe frymës krijuese në shoqërinë tone”, thuhet në një pjesë të mesazhit që Kryepeshkopi Anastas Janullatos publikoi për festën e Pashkëve.
Mesazhi i Kryepeshkopit të Tiranës, Durrësit dhe të gjithë Shqipërisë për dëshpërimin dhe epokat e vështira, vijnë në një kohë që prej disa ditësh në vend janë duke u zhvilluar protesta të njëpasnjëshme dhe ka pasur edhe përplasje mes Policisë dhe protestuesve. Disa ditë më parë edhe Kisha Katolike mbajti një qëndrim zyrtar mbi zhvillimet e fundit në vend ku u dënua me forcë dhuna e ushtruar ndaj njerëzve, por edhe ndaj institucioneve.
