Një nga klinikat më të mëdha sportive mjekësore italiane po synon të shtrihet në futbollin shqiptar, duke përfshirë edhe ekipin kombëtar.
Për këtë arsye, presidenti i Federatës Shqiptare të Futbollit, Armand Duka zhvilloi një vizitë në selinë e klubit të Juventusit.
Duka është takuar me dy administratorët e deleguar të klubit torinez, Giuseppe Marotta dhe Aldo Mazzia, si dhe me administratorin e deleguar të JMedical, Elio Testa.
Sipas njoftimit për shtyp të FSHF-së, në këtë takim është diskutuar mbi asistencën mjekësore që mund t’i ofrohet klubeve të futbollit shqiptar dhe ekipit kombëtar.
“Takimi është fokusuar në shumë pika rreth mundësisë së bashkëpunimit të shpejtë mes FSHF-së, klubit të Juventusit dhe JMedical, duke u fokusuar në asistencën mjekësore që JMedical mund të ofrojë, jo vetëm për sa i përket ekipeve kombëtare, por të ketë një shtrirje në të gjithë futbollin shqiptar. JMedical është një nga klinikat më të mira në botën e sportit dhe të futbollit me një staf të shkëlqyer mjekësh sportivë. Vetë kreu i FSHF-së shprehu angazhimin e Federatës së Futbollit për të nisur sa më shpejt një bashkëpunim konkret. Ftesa për një vizitë në Tiranë në një kohë të përshtatshme u mirëprit edhe nga krerët më të lartë të Juventusit dhe pritet që së shpejti të konfirmohet marrëveshja e diskutuar”, thuhet në njoftimin për shtyp të FSHF-së.
