Krahas protestës së studentëve para Ministrisë së Arsimit dhe asaj të banorëve të Bregut të Lumit, po zhvillohen tre protesta të tjera në Shkodër, Lezhë dhe në Kavajë.
Disa qytetarë janë ngritur teksa protestojnë kundër çmimit të lartë të karburantit në vend. Protestuesit në Kavajë mbajnë veshur jelekë të verdhë, simbol ky i protestuesve në Francë që kërkojnë po ashtu uljen e çmimit të karburantit.
Ndërkohë, në Shkodër është bllokuar rruga hyrëse në qytet për shkak të protestuesve. “Poshtë qeveria, poshtë kriminelët”, dëgjohen brohorimat e qytetarëve në Shkodër.
Ndërkohë në Tiranë, studentët prej disa ditësh protestojnë para godinës së ministrisë së Arsimit për plotësimin e disa kërkesave. Në orën 17:00 pritet të nisë protesta e banorëve të Astirit.
