Prokuroria e Krimeve të Rënda i ka bërë kërkesë Gjykatës së Lartë për të bërë të mundur arrestimin e kreut të Policisë së Shtetit, Haki Çako. Kjo kërkesë vjen në të njëjtën ditë pas kërkesës drejtuar Kuvendit për heqjen e imunitetit të deputetit dhe mundësimin e arrestimit të ish-ministrit të Brendshëm, Saimir Tahiri.
Burime kofindenciale për “Tirana Today”, bëjnë me dije se Prokuroria e Krimeve të Rënda kërkon arrestimin e kreut të Policisë së Shtetit. Akoma nuk është specifikuar akuza me të cilën është bërë kërkesa për arrestimin e Çakos, por mendohet të jetë e njëjta akuzë si ajo e Samir Tahirit në përfshirjen e drejtuesve të lartë të Policisë Shtetit në trafikun e drogës midis Shqipërisë dhe Italisë, ku drejtuesit kryesorë ishin vëllezërit Habilaj, kushërinj të ish-ministrit të Brendshëm.
Midis emrave të Çakos, janë edhe 30 persona të tjerë policie të cilët janë nën hetim pasi kanë bashkëpunuar me grupin kriminal te Habilajve në trafikun e drogës, apo që kanë favorizuar këtë grup. Mësohet se këta emra janë evidentuar nga autoritetet italiane të hetimit dhe i janë përcjellë palës shqiptare. Burimet saktësojnë se mes këtyre emrave ka drejtues të larte në policinë e Vlorës, atë të Fierit, të Delta Force dhe të policisë kufitare në Portin e Vlorës. Bëhet fjalë për persona që kanë drejtuar në këto sektorë që nga viti 2013 dhe deri pak dite më parë kur autoritetet italiane mbyllën hetimet paraprake për grupin e drejtuar nga Moisi Habilaj dhe kryen arrestimet.
