Lëvizje të tjera marrin jetë në kuadër të hetimit për dosjen Habilaj-Tahiri, duke i çuar hetimet në një tjetër fazë. Së fundmi, Prokuroria e Krimeve të Rënda ka kërkuar edhe ndihmën e një tjetër fqinji, pas Italisë.
Burime të BalkanWeb pohojnë se prokuroria i ka përcjellë një letërporosi autoriteteve greke për hetimin ndaj ish-ministrit të Brendshëm Saimir Tahiri, ndaj të cilit rëndojnë dyshime për përfshirje në grupin kriminal Habilaj.
Kjo lëvizje e Prokurorisë vjen në kohën kur për secilin prej të dyshuarve, përfshi edhe ish-ministrin Tahiri është zgjatur afati hetimor edhe për tre muaj të tjerë.
Mësohet se Prokuroria e Krimeve të Rënda do kërkojë informacione në lidhje me lëvizjet e ish-ministrit drejt Greqisë, pasi ka dyshime që ai është takuar me Artan Habilajn në gusht të vitit 2014-të.
Prokuroria dyshon që Habilaj të ketë udhëtuar drejt Greqisë me Audin e famshëm me targa AA003GB, që iu shiti ish-ministri.
