Ylli i Portugalisë, Kristiano Ronaldo tha se skuadra e tij “do të kthehet më e fortë” pasi kampionët në fuqi u eliminuan nga Euro 2020 prej Belgjikës në raundin e 1/8-ave.
“Tifozët na kanë mbështetur pa u lodhur nga fillimi deri në fund,” shkroi Ronaldo në Instagram.
“Nuk ishte e mundur të arrinim atë që kishim synuar, por ju falënderojmë thellësisht. Ne jemi krenarë për udhëtimin tonë dhe kemi dhënë gjithçka për ta mbrojtur këtë titull.”
Portugalia u mund 1-0 nga Belgjika. Ronaldo, i cili shënoi pesë gola në turne, humbi mundësinë për të siguruar rekordin botëror, atë të kryegolashënuesit me kombëtare pasi barazoi 109 golat e iranianit Ali Daei.
Por, me 14 gola në turnetë evropianë, Ronaldo është golashënuesi më i mirë në EURO.
Kryeministri Portugez Antonio Costa tha disa fjalë ngushëllimi.
“Lufta dhe përpjekja nuk ishin të mjaftueshme për të kaluar në raundin tjetër, por ata nderuan edhe një herë ngjyrat e Portugalisë,” shkroi kreu i qeverisë në Twitter.
Zhgënjimi u përhap në të gjitha mediat portugeze. “Kualifikimi goditi shtyllën. Ekipi luftoi deri në sekondën e fundit. Yjet qanë në dhomën e zhveshjes,” shkroi gazeta Jornal de Noticias.
“Ne gjithsesi na mbetet Parisi. Nga kampionët e Evropës tani mbetet vetëm një kujtim i mirë”, shkruajti gazeta sportive “A Bola” në lidhje me Euro 2016, kur Portugalia siguroi titullin në kryeqytetin francez pasi mundi vendasit 1- 0.
