Pas Elbasanit, duket se radhën për ‘porositë’ e Kryeprokurores, e kishte Durrësi. Prokurorja e Përgjithshme Arta Marku ka qenë e pranishme sot në analizën vjetore të Prokurorisë së Durrësit, ku ka dhënë porositë e saj për prokurorët, për thellimin e hetimeve pasurore në lidhje me asetet që kanë në burim të ardhura kriminale nga veprime korruptive.
“Prokurorët nuk duhet të ndalen vetëm me hetimin e veprës penale korruptive, por duhet të thellojnë hetimin pasuror të subjektit të veprës penale në lidhje me asetet që kanë në burim të ardhura kriminale nga veprime korruptive.
Kjo me qëllim jo vetëm ndëshkimin e autorit për krimin e kryer, por dhe sekuestrimin dhe konfiskimin e aseteve te krijuar prej tyre”, tha Marku.
Duke folur konkretisht për qytetin e Durrësit, Marku deklaroi se ai rezulton një qytet me shumë pak vepra penale, ndërsa porositi prokurorët si më poshtë:
Qyteti i Durrësit si një nga qytetet porte të vendit tonë rezulton me shumë pak vepra penale në fushën e kontrabandës, ndërkohë që jemi të vetëdijshëm se sjelljet që cenojnë legjislacionin doganor janë të shumta dhe të ndëshkueshme penalisht. Duhet që edhe kryesisht prokurorët të angazhohen për të evidentuar këto vepra penale në çështjet që hetojnë, duke mos u mbetur të kufizuar vetëm në referimit që mund të vijnë nga policia e shtetit apo vetë doganat.
Konstatohet se ka një ulje të veprave penale kundër jetës, por ka një rritje të agresivitetit nga grupet kriminale në kryerjen e këtyre veprave penale. Autoret në funksion të realizimit të qëllimeve të tyre kriminale janë të gatshëm të sakrifikojnë çdokënd që mund të jetë rastësisht ne rrezen e tyre te veprimit.
Kjo vjen nga mosndëshkimi, apo ndëshkimi i lehtë dhe jo proporcional me krimin e kryer dhe rrezikshmërinë e autorit.
Veprat penale kundër korrupsionit janë shume pak te regjistruara dhe aq me pak kane përfunduar ne gjykim.
Rritja e numrit te pafajësive duhet te jete një kambane për çdo prokuror, për rritjen e përgjegjshmërisë në mbledhjen e provave, vlerësimin e tyre dhe ngritjen drejt të akuzës.
Politika e dënimit duhet të jetë proporcionale ndërmjet veprës penale, autorit dhe interesit publik. Të mbahet qëndrim i ashpër në masat e dënimit për vepra penale me rrezikshmëri te theksuar shoqërore si dhe ndaj veprave penale sensitive për shoqërinë.
