Lazio i Thgomas Strakoshës dështoi të marrë pjesë sezonin e ardhshëm në Champions League, pasi u mposht të dielën në mbrëmje në ndeshjen e fundit të Serie A nga Interi në shtëpi. Kjo ishte një disfatë e rëndë për lacialët pas një sezoni fantastik që kishin kaluar. Por menjëherë pas kësaj humbje për Strakoshën vjen edhe një lajm i keq. Gardiani kuqezi mund të humbasë dy ndeshjet miqësore të përfaqësueses shqiptare kundër Kosovës dhe Ukrainës si pasojë e problemeve me dëmtimin e pësuar në javët e fundit.
Futbollisti ka luajtur me injeksione për shkak të një problemi në shpinë, gjë që ka bërë të mos jetë në formën më të mirë të mundshme. Për këtë arsye, ai i është drejtuar sot klinikës Padeia në Romë, ku shkojnë të gjithë futbollistët e Lazios për vizita më të specializuara mjekësore.
Strakosha do të bëjë disa teste të veçanta për të parë shkallën e dëmtimit dhe sipas mediave italiane, parashikohet që të humbasë ndeshjet e përfaqësueses pasi kërkohet kohë riaftësimi për problemet e tij. Në rast mungese të Strakoshës, Panuçi mund të thërrasë një tjetër portier për ndeshjet miqësore.
