Të mërkurën, raportuesja e Parlamentit Evropian për procesin e liberalizimit të vizave për Kosovën, Tanja Fajon, ka deklaruar se janë përmbushur kriteret e fundit për lëvizjen e lirë të qytetarëve të Kosovës.
Këtë lajm, Fajon e ka bërë të ditur përmes një postimi në Facebook pas takimit me zëvendëskryeministrin e Kosovës, Enver Hoxhaj në Bruksel.
“Patëm një takim me Zëvendës Kryeministrin e Kosovës, Enver Hoxhaj dhe një diskutim një orë e gjysmë të situatën në Kosovë. Ne ramë dakord që heqja e vizave për njerëzit në Kosovë është një qëllim i përbashkët, pasi vendi ka përmbushur kushtet e fundit”, ka deklaruar Fajon.
Bunjaku-Rexhepi: Lëvizjen e lirë të qytetareve e ka mundësuar LDK me votën pro për Demarkacionit
Zëvendësministri i punëve të jashtme, Anton Berisha nuk beson që do të ketë ndryshim të kritereve dhe se shpreson që vendi do të shkojë në ketë ritëm të zhvillimit që të bëhet pjesë e proceseve liberalizuese dhe integruese.
“Nuk besoj që mund të këtë ndryshime ngase kriteret kanë qenë të paracaktuara. Po ashtu shpresojmë se do të mbahet ritmi pozitiv i zhvillimeve në Kosovë ashtu që të bëhemi pjesë e proceseve liberalizuese dhe integruese”, ka thënë Berisha për “Bota sot”.
Lidhur me këtë, deputetja e Lidhjes Demokratike të Kosovës, Valentina Bunjaku Rexhepi, ka theksuar për “Bota sot” se nëse BE kërkon kritere shtesë, Qeveria e Kosovës do të duhej që të dorëhiqet.
“Lëvizjen e lirë të qytetareve e ka mundësuar LDK me votën pro për Demarkacionit. Me këtë qeveri është e mundur që BE të kërkoj edhe kritere shtese, prandaj është në të mirë të qytetarëve që kjo qeveri të tërhiqet vet. Mendoj që i bëjnë nder qytetarëve të Republikës me dhënë dorëheqje. Thjesht është e qartë këtë situatë e kanë kuptuar gjithë qytetarët se kjo qeveri nuk di të udhëheq”, ka deklaruar deputetja e LDK-së.
Në fund, ajo ka thënë se, nëse BE kërkon kritere shtesë kjo qeveri ky President dhe ky Kryeministër nuk ka mundësi t`i plotësojë, sidomos eliminimin e korrupsionit
Ndërkaq, deputetja e Kuvendit të Kosovës, nga Lëvizja Vetëvendosje, Drita Millaku, për deklaratën e Fajon ka potencuar se duhet që të ngutemi duke i cilësuar deklaratat e politikaneve perëndimorë, por do të duhet që qeveria t`i kryejë detyrat e dhëna nga BE-ja.
“Për sa i përket liberalizimit të vizave unë mendoj se ne nuk duhet të ngutemi në cilësimin e deklaratave të politikaneve perëndimorë por duhet që i gjithë aparati i shtetit të kryejë detyrat e ngarkuara nga ana e BE-së”, ka theksuar deputetja për “Bota sot”.
Kushti tjetër Asociacioni?
Sipas, Millakut, qeveria e Kosovës do të duhet që të fokusohet në luftimin e korrupsionit dhe krimit të organizuar, sidomos tek peshqit e mëdhenj dhe se ka frikë që do t`i vendoset si kusht Asociacioni i komunave serbe për liberalizmin e vizave.
“Unë mendoj, se ne kemi punë për të bërë në relacion me korrupsionin dhe krimin e organizuar e sidomos të ashtuquajturit peshqit e mëdhenj, pra qeveria jonë duhet fuqishëm të fokusohet në këtë pikë dhe të bëjë më tepër jo vetëm si kusht i vënë nga BE për edhe të vë standarde të cilat duhet të respektohen nga të gjitha nivelet. Kam shumë frikë se kushti tjetër për liberalizim do të jetë Asociacioni kjo do të ishte katastrofale”, ka thënë Millaku për “Bota sot”.
Kurse, Selim Daku, drejtor i Qendrës Kosovare për Diplomaci, në një prononcim për gazetën “Bota sot”, e ka cilësuar se deklarata e Fajon tregon gjendjen real të situatës dhe se asnjë kush tjetër nuk e pengon që qytetarët e Kosovës të lëvizin të lirë.
“Tanja Fajon ka deklaruar vetëm gjendjen real dhe të situatës. Qytetarët e Kosovës asnjë kusht tjetër nuk i pengon për lëvizje pa viza në zonën schengen. Demarkacioni i kufirit me Malin e Zi ka qenë si kusht jo i drejtë edhe si i tillë ka përmbyllur kushtet kryesore për zhvillimin e procedurave drejt librealizimit të vizave për Kosovën”, ka thënë kreu i Qendrës Kosovare për Diplomaci për “Bota sot”.
Për më shumë, ai ka shtuar se nuk mund të ketë kushte të reja për liberalizimin e vizave për Kosovën.
“Nuk mund të ketë kushte të reja për liberalizimin e vizave për Kosovën. Edhe pse Liberalizimi i vizave është çështje vullneti i shteteve anëtare të Bashkimit Evropian. Demarkacioni ka qene kushti i fundit që ka penguar avancimin e procedurave për lëvizje pa viza. E si i tillë ka mund të përfundoj me një akt. EULEX-i është mision i BE-së për luftimin e krimit të organizuar dhe korrupsionit, që nënkupton se nuk mund të jetë pengesë një kusht, përmbushja e të cilit është përgjegjësi edhe e atij që e vë si të tillë. Kosova ka përfunduar obligimet e saj për liberalizimin e vizave, prandaj shteti duhet të orientohet në zhvillimin e mëtejmë zbatimit të MSA-së që garanton realizim të aspiratave integruese”, ka deklaruar Daku për “Bota sot”.
Tahiri: BE nuk do të vë kushte shtesë për Kosovën
Kurse, politologu Mentor Tahiri ka thënë se raportuesja e BE-së Fajon, ka vlerësim pozitiv për plotësimin e kushteve nga Kosova dhe se institucionet e vendit duhet të dëshmojnë përmirësimin në sundimin e ligjit.
“Raportuesja Tanja Fajon ka vlerësim pozitiv lidhur me plotësimin e kushteve nga ana e Kosovës. Por një vendim lidhur me liberalizimin e vizave, varet nga një serë mekanizmash vendimmarrës në kuadër të BE-së. Institucionet e Kosovës duhet me veprime konkrete të dëshmojnë përmirësimin në sundimin e ligjit”, ka shtuar ai për “Bota sot”.
Më tutje, ai ka theksuar se BE-ja nuk është e interesuar që t`i vë kritere të reja Kosovës, por sipas tij qeveria e Kosovës nuk e ka marr seriozisht dinamiken e luftimit të korrupsionit dhe krimit të organizuar.
“BE nuk është e interesuar që të vë kushte shtesë për Kosovën lidhur me liberalizimin e vizave. Por, është e qartë se luftimi i korrupsionit dhe krimit të organizuar është një kriter i pa kapërcyeshëm. Duhet pranuar se Qeveria e Kosovës nuk e ka marrë shumë seriozisht dinamikën e cila kërkohet. Qeveria e Kosovës duhet të dallojë përkrahjen nga zonja Fajon si një momentum kyç i cili nuk bën të humbet”, ka përfunduar Tahiri për “Bota sot”.
