Ekspertët e shëndetit global janë të shqetësuar se një mutacion ‘i pazakontë’ i variantit Lambda, mund të jetë rezistent ndaj vaksinave kundër koronavirusit.
Varianti Lambda, i njohur zyrtarisht si C.37, u zbulua për herë të parë në Peru dhe është ”përgjegjës” për më shumë se 80 përqind të rasteve në vend, shkruan Sky News.
Një studim në Universitetin e Kilit, Santiago, shqyrtoi efektin e Lambda-s tek disa persona që kishin marrë dy doza të vaksinës kineze. Rezultatet treguan se Lambda është më e infektueshme se variantet Gamma dhe Alpha dhe është më e aftë të shpëtojë nga antitrupat e prodhuar nga vaksinat.
“Ne vëzhguam një infektueshmëri në rritje nga proteina spike e lambda që ishte edhe më e lartë se ajo e D614G ose varianteve Alpha dhe Gamma. Të dhënat tona tregojnë për herë të parë që mutacionet e pranishme në proteinën spike të variantit Lambda, arrijnë t’i shpëtojnë antitrupave neutralizues të shkaktuar nga vaksina e virusit të inaktivuar CoronaVac” thuhej në studim.
Lambda është bërë varianti dominues në Peru në një periudhë shumë të shkurtër kohe.
Varianti i Lambda-s është përhapur në 27 vende, përfshirë Mbretërinë e Bashkuar, duke shkaktuar shqetësim pasi vendi pret të kthehet në normat para-pandemike deri më 19 korrik.
Më shumë se 78 milion doza të vaksinave tani janë administruar në MB dhe 63.4 përqind e të rriturve kanë marrë të dyja dozat.
