Policia e Shtetit, me kërkesë të SPAK, ka vendosur shpalljen në kërkim ndërkombëtar të Stela Gugallja dhe Klodian Zotos. Ata vijojnë të jenë në kërkim, në kuadër të hetimeve për koncesionin e incineratorit të Elbasanit.
Mbi të dyshuarit rëndojnë akuzat e “korrupsionit të zyrtarëve të lartë” dhe të “pastrimit të parave”. Pas kërkimeve që policia ka zhvilluar brenda vendit, SPAK ka kërkuar që ata të shpallen në kërkim ndërkombëtar, pas ka dyshime që mund të jenë larguar nga Shqipëria.
Për rastin është arrestuar ish-ministri i Mjedisit, Lefter Koka, me akuzat për “korrupsion”, “pastrim parash” dhe “shpërdorim detyre”.
Sipas SPAK, Koka ka lejuar përfitime të padrejta nga ana e pronarëve të kontratës së koncesionit, e cila u lidh përmes procedurës së negocimit të drejtpërdrejtë, pa shpallje nën justifikimin e gjendjes së jashtëzakonshme. Klodian Zoto dhe Stela Gugallja akuzohen se kanë kryer transaksione të rreme me paratë e marra nga buxheti i shtetit, për llogari të kontratës koncesionare.
