Lista Serbe ka miratuar nismën për largimin nga Qeveria e Kosovës. Vendimi vjen menjëherë pas arrestimit në Mitrovicë të drejtorit të së ashtuquajturës “Zyrë për Kosovën e Metohinë” në Qeverinë e Serbisë, Marko Gjuriç. Lista Serbe njofton se dhe lidhur me këtë nismë do të njoftohet edhe presidenti i Serbisë, Aleksandër Vuçiç. Lajmin e ka dhënë sot kryetari i Listës Serbe, Goran Rakiç.
“Dialogu në rrethana të tilla, kur populli i paarmatosur ballafaqohet nga forca të shumta të policisë me pushkë të gjata, kur në vend të fjalës futen me pushkë, shkopinj dhe ushtrohet dhunë ndaj qytetarëve serbë, dialogu nuk ka kurrfarë kuptimi”, ka shtuar Rakiç, transmeton Telegrafi.
Kujtojmë se sot policia e Kosovës, arrestoi në pjesën veriore të Mitrovicës, Marko Gjuriç i cili u fut në territorin e Kosovës, edhe përkundër ndalesës që i është bërë nga autoritetet në Prishtinë.
