Kryeministri Edi Rama ishte i ftuar nga presidenti i Juventusit, Andrea Agnelli në “Allianz Stadium” për të parë nga afër kryendeshjen e javës së dytë në Serie A me Lazion. Në ambientet e stadiumit ai është takuar edhe me yllin portugez, Cristiano Ronaldo, me të cilin ka realizuar një foto. Gjithashtu Ronaldo i ka dhuruar edhe një bluzë të firmosur nga vetë ai dhe disa yje të tjerë të Juventusit.
Sëbashku me Igli Taren, kryeministri Rama ka udhëtuar ditën e sotme drejt Torinos me avionin çarter të drejtorit teknik të Lazios i cili po kalon pushimet në Shqipëri. Rama është një tifoz i “çmendur” i Juventusit dhe këtë e ka treguar shumë herë. Më herët, kryeministri publikoi edhe një video me presidentin e Juventusit Andrea Agnelli.
Juventusi fitoi 2-0 ndaj Lazios, por “pengu” për tifozët bardhezinj do të vazhdojë, pasi Ronaldo nuk gjeti dot rrugën e golit, falë një performance mjaft të mirë të gardianit kuqezi, Strakoshës.
