Mark Chapman, autori i vrasjes së këngëtarit të njohur, John Lennon, i ka kërkuar falje bashkëshortes së të ndjerit 40 vite pas krimit.
Gjykata i ka refuzuar atij lirimin me kusht dhe për përsëritjen e kërkesës do të duhet të presë tani edhe dy vite të tjera. Gjatë seancës dëgjimore, ai tha se e vrau 40-vjeçarin që të fitonte famë. I penduar ai pohoi se meritonte dënimin me vdekje për këtë krim.
“E vrava për të fituar famë, ishte një veprim egoist dhe i neveritshëm. Dua të theksoj se më vjen keq për krimin që kam kryer dhe për dhimbjen që kam shkaktuar. Ai ishte njeri familjar, ishte ikonë, ishte jashtëzakonisht i famshëm. Më vjen keq për dhimbjen që i kam shkaktuar gruas së tij. Më rri mendja aty gjatë gjithë kohës”, tha ai.
Chapman ishte vetëm 25 vjeç kur vrau yllin e “The Beatles”, ndërsa sot është 65 vjeç. John Lennon u vra më 8 dhjetor të vitit 1980, teksa u qëllua me 4 plumba jashtë apartamentit të tij në New York.
