Juventus ka siguruar shërbimet e Cristiano Ronaldos me një operacion që besohet të ketë kushtuar plot 370 milionë euro. Por duket se nga kjo lëvizje nuk janë të kënaqur të gjithë në Torino. Zërin e kanë ngritur punëtorët e FIAT-it që është edhe sponsori kryesor i bardhezinjve.
Disa ish-punëtorë, të cilët janë pushuar nga puna kohët e fundit, kanë vendosur në portat e fabrikës parulla si: “Për Cristianon 400 milionë; për punëtorët, një shkelm b… “.
“Është e papranueshme që punëtorët e Fiat të bëjnë sakrifica të mëdha financiare, ndërsa kompania shpenzon miliona euro për një futbollist. Ata u thonë familjeve të shtrëngojnë rripat sepse situata nuk është e mirë dhe pastaj ata investojnë një shumë marramendëse për një lojtar. A është e drejtë? A është normale që një person të fitojë miliona, ndërsa mijëra familje punëtore nuk arrijnë të mbijetojnë? Ne jemi të gjithë punonjës dhe ky ndryshim në trajtim nuk mund të vazhdojë. Punëtorët Fiat kanë pasuruar tre breza dhe si shpërblim kanë marrë vetëm mjerim”, lexohet në deklaratë.
Unioni bën thirrje për më shumë investime në prodhim dhe në rritjen e kompanisë sesa në futboll: “Shoqëria duhet të investojë në modelet e makinave që garantojnë të ardhmen e mijëra njerëzve, në vend që të pasurojnë vetëm një njeri”.
