Gianluigi Buffon pas një eksperience të gjatë me ngjyrat bardhezi të Juventusit, ka vendosur që të largohet drejt PSG-së për të vazhduar të luaj në nivele të larta. Në një intervistë për “Tuttosport” partnerja e gardianit italian, Ilaria D’Amicol, ka folur për kalimin e tij në Francë, por ka treguar edhe frikën më të madhe të tij.
“Kur i është paraqitur mundësia për të vazhduar karrierën te PSG, nuk është menduar dy herë. Donte të qëndronte në nivele të larta, por nuk mund ta bënte me Juventus. Oferta e bërë nga Parisi ka qenë ajo më e kënaqshmja”, ka thënë D’Amico.
“Marrëdhënia e tij me Juventus-in mbetet fantastike: i adhuron ato ngjyra dhe tifozët e adhurojnë atë, por kjo është aventurë e re dhe unë i uroj më të mirën e mundshme. Është i lumtur dhe entuziast si një fëmijë. Juve-PSG në Champions? Ka thënë ‘shpresoj që jeta të ma kursejë këtë’ dhe e kuptoj, sepse Gigi është i dashuruar me Juventus-in, do të jetë gjithmonë”, ka përfunduar D’Amico.
