Në Malin e zi do të ketë zgjedhje më 26 nëntor. Këto zgjedhje janë të veçanta për partitë politike shqiptare sepse kanë vendosur që të jenë bashkë. Faktori politik shqiptar në Malin e Zi ka firmosur koalicionin, ku zotohen se të bashkuar, në dakordësi dhe bashkëpunim do të hartojnë listat dhe koalicionet zgjedhore.
Një platformë e vetme e përbashkët që do të jetë në gjendje të përfaqësojnë siç duhet interesat e shqiptarëve, duke lënë jashtë dallimet ideologjike të formacioneve politike të 4 partive shqiptare, ka bërë që këto të fundit të nënshkruajnë një marrëveshje të përbashkët.
“Jemi dakord që në zgjedhjet lokale të 26 nëntorit 2017, të maksimalizojmë rezultatin zgjedhor në favor të kandidatëve shqiptar. Mbi këtë bazë, në dakordësi e bashkëpunim, do të ndërtohen listat dhe koalicionet zgjedhore.
Ftojmë publikisht të gjithë faktorët politikë dhe shoqërorë, që të dalim me një zë të përbashkët në mbështetje të kandidaturave shqiptare.
-Pas zgjedhjeve dhe në bazë të rezultatit, formacionet, listat dhe subjektet zgjedhore nuk do të mund të angazhohen në asnjë mënyrë veçmas por vetëm së bashku për formimin e shumicës në këshillin komunal të komunës së Tuzit”, thuhet në deklaratën e përbashkët të partive shqiptare në Tuz, shkruan tch.
Burimet thonë se Tirana zyrtare ka luajtur një rol vendimtar që ata të bëhen bashkë. Mësohet se janë kontaktuar dhe janë bërë takime të herëpashershme me faktorin shqiptar atje dhe është punuar shumë që të arrihet kjo marrëveshje tek shqiptarët e kësaj krahine.
