Parker sfidon Joshuan: Nuk e bëj për famë dhe para

Supermeçi me Joshua dhe Parker do të zhvillohet në 31 mars në “Principality Stadium” të Kardifit. Dy boksierët kampionë bote në peshat rënda do të zhvillojnë një duel për unifikimin e titujve kampionë. Neo-zelandez, Joseph Parker ka dalë hapur se dëshira e tij është të fitojë titujt dhe është duke u përgatitur maksimalisht për ta arritur këtë gjë. 26-vjeçari ndodhet në vendlindje për të përgatitur këtë event të madh dhe shprehet se është i motivuar përballë britanikut.

“Nuk mendoj se është fama ajo që unë kërkoj nga kjo sfidë, por titujt kampionë bote që mban Joshua. Unë synoj titujt, që janë objektivi im kryesor dhe jo paratë. Këto të fundit janë rrjedhojë e fitores që do të arrij në këtë përballje. Jam shumë i motivuar, pasi dua të tregoj se sa vlej dhe t’i them Joshua se flet shumë”, u shpreh Joseph Parker, kampion bote i kategorisë WBO, i pamposhtur në ring (24 fitore). Ndërsa boksieri Anthony Joshua mban titujt e kategorive IBF dhe WBA, por edhe britaniku është i pamposhtur në ring (20 fitore).