Analisti Red Varaku është i mendimit se lëvizjet e kryeministrit Rama me ministrat e rinj, kanë lidhje jo me atë që ka kaluar, por me atë që pritet të vijë në janar. Ky është qëndrimi i tij bërë publik në studion e “Ora News”, duke u kundërpërgjigjur në këtë formë edhe në lidhje me zërat që qarkulluan se shkak u bënë protestat masive të studentëve. Analisti shtoi më tej se në janar priten që të ndodhin zhvillime të mëdha, ku Rama do të përballet me skandale të jashtëzakonshme.
“Unë mendoj që lëvizjet që Rama bëri në këto momente, kanë lidhje jo me atë që ka kaluar, por me atë që pritet të vijë në janar. Pra nuk janë, siç mendon shumica, pasojë e presionit të protestave studentore, apo banorëve të Astirit.
Në mendimin tim, ai parapërgatitet që të përballet me një situatë të jashtëzakonshme në janar. Janë lëvizje që i ka bërë në funksion të janarit, dhe nuk ka lidhje me punën e ministrave.
Në janar priten të ndodhin zhvillime shumë të mëdha. Në opinionin tim, mendoj që ai do të përballet me skandale të jashtëzakonshme, që do ta vënë atë në situata të vështira.
Pritet që në janar ai të përballet me një situatë që nuk e di si do ta menaxhojë, mund të pretendohet në grisjen e mandateve nga opozita dhe të shkohet në zgjedhje të parakohshme”.
