Opozita ka kërkuar sot dorëheqjen e kreut të Kuvendit, Gramoz Ruçi.
Kjo kërkesë u parashtrua në Konferencën e Kryetarëve, e cila u mblodh sot në kryesinë e Kuvendit për të vendosur për kalendarin 3 javor të punimeve të parlamentit.
Por, teksa mori pjesë në mbledhja, opozita ka bërë një kërkesë të fortë, teksa që në nisje deputeti Edmond Spaho kërkoi dorëheqjen e kryetarit të Kuvendit Gramoz Ruçi, pasi sipas tij ka zbatuar një puç kushtetues në rastin e votimit të Kryeprokurores së përkohshme Arta Marku.
“Është bërë një puç kushtetues. Kryetari i Kuvendit duhet të japë dorëheqjen. Më 18 dhjetor u krye puç kushtetues, i urdhëruar nga Edi Rama, por i zbatuar nga Ruçi. Kryeprokurori duhej të zgjidhej me 3/5, i propozuar nga KLP dhe me vetting. U emërua me 69 vota, nga PS dhe pa vetting. Qëllimi i emërimit antikushtetues i Kryeprokurorit është t’i japë mbrojtje ligjore pushtetit të inkriminuar dhe të korruptuar të Edi Ramës. Opozita nuk mund të lejojë shkeljen e vazhdueshme të Kushtetutës dhe delegjitimimin e institucioneve”, deklaroi Spaho.
Kësaj kërkese i është përgjigjur kreu i grupit parlamentar të PS-së, Taulant Balla, i cili tha se Kushtetuta e ka përcaktuar qartë se 28 deputetë mund të kërkojnë interpretimin në Gjykatë Kushtetuese të vendimeve që merr parlamenti.
