Në një kohë kur Italia po përballet me prurjet e dhjetëra mijëra emigrantëve nga zonat e konfliktit në Lindjen e Mesme, duke vënë në diskutim edhe mbylljen e kufijve, kreu i Vatikanit e konsideron prezencën e tyre, si një vlerë për Evropën dhe një mundësi që i është dhënë asaj, për t’u bërë edhe më e mirë.
Papa Françesku tha sot se “Prania e tyre është një mundësi për rritjen e njeriut, takimit dhe dialogut mes kulturave me qëllim promovimin e paqes dhe vëllazërimit mes popujve.”
”Ndihma për emigrantët është një nga “vlerat njerëzore dhe të krishtera që janë baza e qytetërimit evropian”, shtoi ai teksa nga ana tjetër nënvizoi se “është detyrë e emigrantëve të respektojnë ligjet e vendeve pritëse.”
Papa bëri thirrje që “kushdo që ka mundësinë t’i trajtojë dhe përkrahë emigrantët në mënyrë vëllazërore dhe të ndajë me ta bukën dhe shpresën në rrugën e përbashkët.”
