Mesfushori Taulant Xhaka ka pasur një përplasje me ish trajnerin e Kombëtares Shqiptare, Xhani De Biazin, dhe ka deklaruar se nuk do të kthehet më për sa kohë që kombëtarja të udhëhiqet nga ky trajner. Ndërkohë që as De Biazi nuk është treguar tolerant, ai nuk denjoi t’i bënte ftesë futbollistit për ndeshjen me Izraelin, duke theksuar se sa kohë të ishte ai, mesfushori mund të vazhdonte të qëndronte larg Kombëtares pasi nuk do të kthehej aty pa kërkuar falje.
Kristian Panuçi, trajneri i ri i kuqezinjve, ka udhëtuar sot drejt Bazelit për të rilidhur marrëdhëniet e mesfushorit me Kombëtaren. Mësohet se përgjigja e Xhakës ka qenë pozitive dhe ai është gati të kthehet kuqezi, pa pasur nevojë që t’i kërkojë falje askujt. Por kjo, është vetëm njëra anë e medaljes, pasi vizita e Panuçit në ndeshjen e sotme mes Bazelit dhe Lucernës i ka shërbyer trajnerit të Kombëtares për të mësuar se Xhaka mund të mos luajë më rregullisht në klubin e tij.
Bazeli po përdor një skemë të re 3-5-2 për kampionët e Zvicrës dhe një nga emrat e sakrifikuar është ai i Xhakës, që duhet të ulet në stol. Për momentin, ai nuk është zgjedhje e parë në mesfushë dhe në Zvicër, mediat vendase e shohin atë si një “alternativë” ndaj titullarëve. Futbollisti nuk pritet të bëjë të njëjtën gjë si me Kombëtaren në klubin e tij, duke pritur momentin për t’u kthyer në fushë dhe për të treguar se sa vlen.
