Trajneri i kombëtares shqiptare, Christian Panucci ka dalë në një konferencë për mediat në ambientet e FSHF, pas fitores 3-2 në miqësoren e zhvilluar me Turqinë në Antalia. Fillimisht tekniku italian ka folur për risitë që ka sjellë në ekip dhe për disa nga lojtarët ë të cilat do të hidhen bazat e skemës që do të ndjekë ai për të pasur sukses me Shqipërinë.
“Nuk e di sesa ka ndryshuar skuadra. Unë mundohem t’i jap cilësinë më të mirë të mundshme, sepse kemi shumë pak kohë për të punuar. Qaka është një lojtar me shumë talent dhe unë jam shumë i kënaqur që e grumbullova. Ajdarevici gjithashtu ka cilësi, por i duhet dhënë më shumë besim. Unë kam idetë e mia, De Biasi ka patur të tijat, sigurisht që do të ketë ndryshim. Shpresoj të arrij rezultatet e De Biasit. Ramadani është lojtar që do të bëjë pjesë në grupin tonë më pëlqen shumë, por janë edhe 4-5 lojtarë të tjerë për të cilët kam folur edhe me Bushin. Nuk i them emrat sepse janë të rinj. Do të kemi një grumbullim në mars, ku do të shohim 2-3 futbollistë. Duhet të kemi një bazë të rëndësishme, për të krijuar grupin që do të jetë në eliminatoret e Europianit. Janë 5-6 lojtarë të cilët i kam parë në video, por duhet t’i shoh edhe nga afër. E sigurt që do të ketë prurje të reja në mars. Kam shumë besim te Aliji dhe Lenjani, te Memolla. Shpresoj shumë që Aliji të gjejë skuadër në janar. Më duket shumë e çuditshme që nuk ka skuadër. Do të vijë edhe në mars, nëse nuk transferohet diku. Edhe Veseli mund të luajë në atë krah. Hysaj për momentin është i paprekshëm në rolin e tij, por askush nuk e ka vendin të sigurt në kombëtare.”
Sa i përket fitores ndaj Trqisë, Panucci nuk është kënaqur vetëm nga rezultati,por edhe nga karakteri që treguan lojtarët në pjesën e dytë kur ishin me një lojtarë më pak. Ai admiron shumë grupin e lojtarëve që ka në dispozicion, pasi janë shumë të përkushtuar ndaj punës në stërvitje dhe nëse stërvitesh mirë normalisht që do të zhvillosh edhe një ndeshje të mirë.
“Siç stërvitesh, ashtu do të luash. Mendoj se kemi cilësi për të arritur objektiva të rëndësishme. Është e rëndësishme që lojtarët e besojnë tek ato që unë them. Kam parë që lojtarët janë të drejtpërdrejtë, janë shprehur dhe kjo më pëlqen shumë. Është shumë e rëndësishme puna e lojtarëve në klubet e tyre. Mendoj se në pjesën e parë ndaj Turqisë pamë punën që kemi bërë në Antalia. Luajtëm një futboll të shkëlqyer. Në fakt, u bënë dy ndeshje, në pjesën e parë kishim shumë kualitet, ndërsa në pjesën e dytë kur, mbetëm me 10 lojtarë, luajtëm me karakter. U demonstrua ai karakter që unë dëshiroj, duke mos toleruar asgjë. Futbollistët kanë qenë të jashtëzakonshëm gjatë qëndrimit në Antalia, rezultati është produkt i këtij qëndrimi profesionist.”
Italia ka mbetur jashtë Botërorit, një dramë për të gjithë italianët, por që do të ketë ndikim edhe në futbollin e tyre në vitet e ardhshme. Por për Panuccin beso se faji ka qenë i të gjithë sistemit de duhen bërë ndërhyrje menjëherë.
“Si italian më vjen shumë keq që përfaqësuesja e vendit tim ka mbetur jashtë Botërorit, por faji është i të gjithë sistemit, asgjë nuk është e rastësishme. Do të jetë shumë e vështirë për Italinë që të kthehet në nivelet më të larta. Italia nuk dëshiron t’i gjejë elementët për të ndërtuar një kombëtare të fortë, por ky nuk është problem im”, përfundoi tekniku italian, Panucci.
