Në selinë e Federatës Shqiptare të Futbollit është organizuar një takim mes trajnerëve të ekipeve të moshave të kombëtares dhe trajnerit italian Christian Panuccit, me kërkesë të këtij të fundit. Kjo mbledhje vjen rreth 1 muaj para se kombëtarja të mblidhet në Zvicër për të zhvilluar turin 10-ditor të përgatitjes për ndeshjen me Ukrainën. Ishte planifikuar edhe një ballafaqim i tillë me Kosovën, por duket se situata në këtë drejtim është ndërlikuar dhe gjithçka ka rënë poshtë.
Pas mbledhjes ka folur për mediat trajneri i kombëtares, ku ka sqaruar disa çështje dhe të ardhmen e kombëtares. Apo dhe se çfarë duhet të ndryshojë pas asaj shfaqje të shëmtuar me Norvegjinë.
“Sot zhvilluam një mbledhje me të gjithë trajnerët e kombëtareve të moshave. Federata Shqiptare e Futbollit po investon për të rritur sa më shumë talente nga Shqipëria. Shpresojmë që të lindin sa më shumë lojtarë me cilësi, që në të ardhmen t’i shërbejnë përfaqësueses. E rëndësishme është që puna dhe bashkëpunimi me klubet ka nisur.
Po punohet për të plotësuar grupin, sepse humbja në miqësoren me Norvegjinë na ka bërë të kuptojmë se ka diçka që nuk shkon, duhet ndryshuar. Fizikisht lojtarët nuk do të vijnë në maksimumin e mundshëm, megjithatë kombëtarja është kombëtare dhe nuk ka shumë ndeshje miqësore, kështu që në 10 ditët e grumbullimit në Zvicër duhet të punojmë me seriozitet, për të vijuar me përgatitjet në kuadër të Ligës së Kombeve dhe eliminatoreve të Europianit.
I kuptoj futbollistët, që kanë zhvilluar një sezon të lodhshëm, duke dhënë gjithçka, megjithatë duhet të japin edhe diçka për kombëtaren në mbyllje të sezonit, sepse me skuadrën përfaqësuese nuk bëhet shaka. Grupin po e formojmë. Pas humbjes me Norvegjinë e kuptova që diçka duhet ta ndryshojmë, por me fokusin kryesor te mënyra e lojës. Në Zvicër do të provojmë disa aspekte të rëndësishme.
Guri po shkëlqen me Kukësin? Ai ia ka bërë vetë vendin vetes në kombëtare, nëpërmjet paraqitjeve dhe golave që po shënon. Duhet të vazhdojë të punojë dhe shpresojmë të jetë pjesë e grupit. Sidoqoftë, gjithçka varet nga ai. Unë ftoj gjithnjë më të mirët.
Marco Cassetti, ndihmësi im i ri? Besoj se ka mbi 300 ndeshje në Seria A. Kemi qenë shokë skuadre te Roma. Kam një marrëdhënie mjaft të mirë me të, mund të më ndihmojë sidomos me mbrojtësit. Puna e tij do të ketë shumë vlera në përmirësimin e repartit difensiv”.
