Trajneri i ri i kombëtares shqiptare, Christian Panucci ka dalë sot në një konferencë për shtyp, për të dhënë detaje para takimeve me Lihtenshtejnin dhe Maqedoninë.
Panucci tha se ka grumbulluar 24 lojtarët që do i nevojiten për këto ndeshje, ndër të cilët 3 janë lojtarë të rinj.
Gjithashtu, Panucci ka treguar se ka lënë jashtë Sokol Cikalleshin, të cilin e kishte njoftuar për të ardhur në kombëtare, por ai ishte justifikuar se duhet të firmoste për ekipin e ri.
Më tej, trajneri i kombëtares, i pyetur nga gazetarët për kapitenin e ri, nuk ka dhënë emra, por ka thënë se kapiten do të bëhet ai që ka më shumë prezencë në fushë.
Panucci foli edhe për Xhakën, mungesën e të cilit e quajti “çështje teknike”, ndërsa shtoi se ai i kishte kërkuar falje.
FJALA E PANUCCIT:
Listën e lojtarëve e përcolla ditën e premte, është me 24 lojtarë, mes të cilëve 3 të rinj që e kanë merituar. Fola me Cikalleshin në telefon sot në mëngjes, pasi më tha që nuk mund të vinte pasi duhet të firmoste një kontratë me ekipin e ri. Pasi i dëgjova i thashë që nuk mund të të jap leje për të ardhur me ekipin, pasi kontratat firmosen edhe me e-mail, por edhe nëpërmjet menaxherit që ta marrë me avion kontratën. Dhe meqë nuk mori avionin e orës 8 të mëngjesit dhe duke mos ardhur në orarin e grumbullimit, lojtari do të qëndrojë në shtëpi, sepse ka rregulla që duhen respektuar. E rëndësishme për mua është që lojtarët të ndihen mirë, por nuk i lejoj askujt të bëjë si të dojë.
Portat janë të hapura për Xhaken dhe Kaçen. Më telefonoi avokati i Xhakës dhe ai vetë, pranova faljet prej tij, këtë çështje e konsideroj të mbyllur. Nuk mbaj mëri.
Komplimentat e mia për Skënderbeun. Do ta ndjek edhe Skënderbeun në vazhdimësi, nëse do të ketë lojtarë të denjë për Kombëtaren do të jenë të mirëpritur.
Gashi nuk ishte prezent në këtë grumbullim, sepse bëra disa zgjedhje të tjera. Kam tre portierë me nivel të shkëlqyer.
Nëse dikush vjen në 3, një në 5 dhe një në 8, nuk shkojmë askund. Të jesh në kombëtare është një nder dhe çdo lojtar duhet të jetë korrekt e të zbatojë rregullat.
Kapiteni do të jetë ai që është më shumë prezent në fushë. Pa disiplinë nuk mund të fitohen ndeshjet. Do punojmë të mundim Lihtenshtejnin dhe Maqedoninë.
Kombëtarja shqiptare ka fituar respekt në Evropë.
