Kombëtarja zhvilloi stërvitjen e fundit në tokën shqiptare, përpara nisjes drejt Spanjës. Lajmi i keq për dëmtimin e sulmuesit Sokol Cikalleshi u shoqërua me zhvillimet pozitive rreth gjendjes së portierit Etrit Berisha. Gardiani titullar e ka kaluar plotësisht gjendjen gripale dhe do të jetë i gatshëm për të luajtur më 6 Tetor në Alikante. E njëjta vlen edhe për Elseid Hysajn, pasi edhe mbrojtësi i Napolit ishte prekur nga virozat e stinës.
Berisha iu bashkua pjesës tjetër të grupit në stërvitje, aty ku është rikthyer edhe portieri Enea Koliçi, që mori leje për një pasdite për të kryer procedurat për pajisjen me pasaportën e re. Përgatitjet e skuadrës kuqezi kanë vazhduar nën masat strikte të vendosura nga trajneri Panuçi, që në 15 minutat kur seanca zhvillohet me dyer të hapura për mediat, e mban skuadrën shumë larg kamerave.
Masat e forta nuk vlejnë vetëm për mediat, por edhe për skuadrën. Drejtuesi i stolit ia ka bërë të qartë ekipit që pretendon përqendrim maksimal në stërvitje dhe për aq kohë sa lojtarët janë në fushë nuk lejohen shakatë dhe të qeshurat. Kombëtarja shqiptare do të udhëtojë drejt Spanjës të enjten, në orën 10 të paradites me një fluturim direkt nga aeroporti Nënë Tereza. Në orën 18:15 trajneri Panuçi dhe kapiteni Agolli do të shfaqen në konferencë për shtyp, ndërsa në orën 18:45 kuqezinjtë do të zhvillojnë stërvitjen zyrtare përpara duelit me kampionët e botës.
