Edhe pse penalltia e tij është goditur më shumë se 40 vite më parë, ende sot kujtohet dhe imitohet nga shumica e futbollistëve. Bëhet fjalë për Antonin Panenkan, i cili është bërë pjesë e historisë pas asaj penalltie që i dha Çekosllovakisë Kupën e Europës në vitin 1976.
Më pas, gjuajtjet e tilla të penalltive morën emrin e tij, pasi shumë lojtarë të klasit botëror kanë tentuar të realizojnë me “Panenka” nga pika e bardhë. Megjithatë, 69-vjeçari ka zgjedhur futbollistin që e interpreton më mirë atë dhe nuk bëhet fjalë për një sulmues apo mesfushorë me shumë talent:
Mua më pëlqen shumë Sergio Ramos. E ka bërë shumë herë, edhe në Euro 2012. Mendoj se mund të jetë imituesi më i mirë i imi, ai që i shënon penalltitë më mirë me Panenka. Kjo, pasi e ka bërë shumë herë, njerëzit e dinë dhe ai përsëri vazhdon të shënojë ashtu. Është gjenial”, ka thënë fillimisht ish-mesfushori çek në një intervistë për “Goal”.
“E kisha praktikuar 2 vite para Europianit të 1976. Kuptova se të gjithë portierët hidheshin majtas apo djathtas, ndaj ishte mirë të gjuaja në qendër. Pas çdo stërvitje, bënim sfida me portierin tonë Hruska për penalltitë. Ai ishte shumë i mirë, ndaj humbja gjithmonë bastet: para, çokollata, gjëra të tilla. Ndaj fillova të përdorja hilenë time dhe nisa të fitoja gjithnjë e më shumë. E keqja është se fillova edhe të shëndoshesha nga çokollatat që i fitoja”, përfundoi ai intervistën.
