Një ngjarje e rëndë është regjistruar në Panama, teksa shtatë persona janë gjetur të masakruar në një varr masiv.
Një grua shtatzënë dhe gjashtë fëmijë përfshirë një fëmijë 1-vjeçar dhe një 3-vjeçar u torturuan, u masakruan dhe u varrosën, si pjesë e një vrasjeje të çuditshme, ritualiste nga një kult fetar.
Ngjarja u regjistrua në një zonë të largët të rajonit Ngäbe-Buglé, e cila është shtëpi e një komuniteti të madh të banorëve vendas. Në lidhje me këtë ngjarje janë arrestuar 9 indigjenë të cilët akuzohen për sulmet e ashpra.
Autoritetet thanë se në varr u gjetën kufomat e tre djemve dhe tre vajzave 2 dhe 9-vjeçar, plus të tjerë të moshës 1, 3, 11 dhe 17. Nëna 32-vjeçare e pesë fëmijëve, e cila ishte diku te katër apo gjashtë muajshe shtatzënë, u gjet gjithashtu e vdekur në varr.
“Viktimat u vranë pasi nuk u penduan për mëkatet e tyre”, u tha gazetarëve prokurori publik i rajonit, Rafael Baloyes.
Ai shtoi se kulti kishte qenë aktiv për rreth tre muaj, por nuk kishte dëmtuar njerëzit deri në këtë gjendje. Kjo gjë sipas tij u nxit kur një nga anëtarët e komunitetit besoi se kishin marrë një mesazh nga Zoti.
Policia bastisi ambientet e kultit të errët dhe shpëtoi edhe 15 persona të tjerë, të cilët besohet se ishin në radhën e vrasjeve të ngjashme. Ata arrestuan disa njerëz dhe gjetën prova të mjaftueshme për t’i lidhur ato me vrasjet. Një nga të arrestuarit ishte gjyshi i disa prej fëmijëve të vrarë.
“Duket se ata ishin anëtarë të një kulti fetar që kryenin rituale dhe ata me sa duket ishin përgjegjës për krimin”, tha Baloyes në deklaratë.
Kulti e quajti veten “Kisha e Zotit”, tha ai.
Baloyes shtoi se autoritetet kryen një hetim në komunitetet lokale për të parë nëse dikush tjetër ishte i zhdukur, por nuk gjeti më viktima.
