Boksieri britanik Anthony Joshua që do përballet me Joseph Parker më 31 mars për të unifikuar titujt kampion bote ka një frikë. Ai është bërë mjaft nervoz në momentin që është pyetur se çfarë do të ndodhte nëse humbiste. Joshua u shpreh se është fokusuar totalisht te kjo sfidë dhe nuk i trembet as humbjes.
“Në boks, fjala humbje të bën nervoz. Asnjë nga ne nuk dëshiron që t’i ikë shifra “0” e humbjeve. Nuk planifikon dhe nuk mendon se do të humbasësh. Në çdo sport tjetër mund të humbasësh dhe të rikthehesh te fitorja, këtu është e vështirë”, u shpreh Anthony Joshua në një intervistë për “Sky Sports” ,20 fitore dhe asnjë humbje si profesionist për britanikun.
I pyetur nëse e frikëson fjala “humbje”, britaniku pranoi se: “Po, pasi kjo fjalë është pjesë e sportit. Federer është i njohur i madh për fitoret, por askush nuk i njeh 10 njerëzit që mund ta kenë mundur më parë. Ndërsa në boks, ajo humbje mbetet përjetë në rekordet e tua. Humbja nuk përkufizon ato që ke arritur, por është mënyra se si lëviz për t’i arritur ato. Duhet të dish se ku po shkon”, u shpreh më tej boksieri britanik. Joshua shpreson të mbrojë titullin dhe të jetë protagonist në peshat e rënda edhe për një dekadë. “Jam 28 vjeç, Klitschko u tërhoq 40 vjeç, Mayweather në moshën 41-vjeçare, ndaj besoj se kam ende shumë për të dhënë. Nuk dua të largohem nga ky sport kaq shpejt. Nuk e bëj këtë gjë për famë, por sepse më pëlqen të boksoj”, tha Joshua.
